t Populeare poëziefestival in t Achterhookse doarp Gelster is ne vrucht van nen oaldn appelboom. In ne kortigheed van tied nöm de poëziewedstried de vergangn joarn ne hoge vlocht met thema’s as ‘appel’, ‘bron’ en ‘zwaluw’. Op dit podium kreagn Neersasse dichters net zo völ ruumte as Neerlaandse. A rap wördn t n festein dat oaverhen de laandsgreanzn kleunk. Nich eankeld döadn der leu met oet alle heuke van Neerlaand, mer ok oet Belgieje en Duutslaand.
Doarp van dree schrievnde schoolmeisters
Nöast ‘gaanzngat’ is Gelser ok et doarp van de ‘dree schrievnde meisters’, zooas den poëties ingesteldn H.W. Heuvel. In n keunstwerk nöast nen oaldn appelboom anbiej de monumentale boerderiej Winkels an de Doarpsstroat wördt Heuvel eerd met H.J. Krebbers en G.A. van der Lugt.
Den oaldn vruchtboom göf de kulturele Stichting Bie Winkels in 2019 anleiding tut t organiseern van nen Appeldag, den seend dee tied alle joar op nen zoaterdag in oktober hoaldn wördt.
Poëzieleefhebbers binn de stichting mosn geliek deankn an t gedicht Onder de appelboom van Rutger Kopland, joonk wördn in t Twentse Goor, nich wied hier vandan. Zo kwamn ze op den tekst um vuur dizn dag in oktober ok poëziewedstriedn te hoaldn. As pasnde stie vuur t ofsloetnde poëziefeest wördn köazn vuur t Gelster doarpskearkke. Leu met wiksie döadn voort met. Zo greuidn de poëzieoavnde oet tut de finale van n Appeldag. Van oaver heel de weerld kon de leu metkiekn en -luustern via YouTube..
Verhuusd noar Stichting Portfolio
Appels brachtn in Gelster a heel wat an t kuuln. t Poëziefestival wasn zoodöanig an, dat et de Stichting Bie Winkels oet t jäske greuin. Doarvandan dat t poëzieprojekt noa beroad verhuusd is noar de Stichting Portfolio. Zo kan et de vlöggels luk wieder oetsloan. Oonderwiel is den tweedn zoaterdag in oktober köazn tut vastn dag vuur t ofsloetnde festein, woarmet n klean doarp groots vuur n dag keump.
n Feestelik finale-trefn van t joarlikse poëziefestival is op den tweedn zoaterdag van oktober.
Hieronder kunt u per jaar zien hoe het was, en binnenkort ook wat er op de agenda staat voor 2022!
